Loading ...
QUMUQ TÜZÜM!
Qumuq tüzüm — anam meni, abayım,
qulaç yayıp,quçaqlama çabayım,
yüwşanlıqda tawşan yimik tas bolğan
talayıñnı seni qaydan tabayım?!
Qumuq tüzüm — atam meni, atayım,
sen yuxla, men qarawulda qatayım,
alamatday meni qumuq tüzümnü
satğannı tap alaşasın satayım.
Xalqım meni, qalqım meni, qalqanım,
sensiz mağa soqmaq da yoq, yol da yoq,
awur yolda awup atdan tüşsem men,
tartıp meni turğuzmağa qol da yoq.
Üwuşan iyis, yuwaş etip barağan,
pastan iyis, tanawuñnu yarağan,
Qumuq tüzüm, altın güzüm, üzügüm,
oñmay qalsın sağa yaman yorağan!
Xalqım meni — qalqım meni, qalqanım,
sensiz mağa maqam da yoq, yır da yoq,
erkin tınış alıp, erkin aylanma
sensiz mağa awlaq da yoq, qır da yoq.
Qumuq tüzüm — süygen qızım, qızaşım,
sensiz mağa yazbaş da yoq, yay da yoq,
qumuq tüzün, anasınday sağınıp
aylanağan qumuq yaşlar qayda yoq?!
Mahammat ATABAYEW, Dağıstannı xalq şairi.
Къумукъ тюзюм — атам мени, атайым,
сен юхла, мен къаравулда къатайым,
аламатдай мени къумукъ тюзюмню
сатгъанны тап алашасын сатайым.
Халкъым мени, къалкъым мени, къалкъаным,
сенсиз магъа сокъмакъ да ёкъ, ёл да ёкъ,
авур ёлда авуп атдан тюшсем мен,
тартып мени тургъузмагъа къол да ёкъ.
Ювушан ийис, юваш этип барагъан,
пастан ийис, танавунгну ярагъан,
Къумукъ тюзюм, алтын гюзюм, юзюгюм,
онгмай къалсын сагъа яман ёрагъан!
Халкъым мени — къалкъым мени, къалкъаным,
сенсиз магъа макъам да ёкъ, йыр да ёкъ,
эркин тыныш алып, эркин айланма
сенсиз магъа авлакъ да ёкъ, къыр да ёкъ.
Къумукъ тюзюм — сюйген къызым, къызашым,
сенсиз магъа язбаш да ёкъ, яй да ёкъ,
къумукъ тюзюн, анасындай сагъынып
айланагъан къумукъ яшлар къайда ёкъ?!
Магьаммат АТАБАЕВ,
Дагъыстанны халкъ шаири.