Bizin tarix bizin tas bolma qoymay

13509715_10208651025966418_493325175_oQumuqlar yañız özleni Elinde yaşap qalmay, saw dünyağa yayılğan. Bizge de qısmatıbız bizin ullu dewletibizni taxşaharında yaşamağa buyurğan. Birler bulay yayılıwdan yamanlıqdan qayrı dağı zat görmey, biz busa bu halda imkanlıqlar da barın mekenli añlağanbız. Qumuqda çıqğan tawuş yañız Qumuqnu qulağın yeler, amma taxşaharda aytılğan söznü güçü ülkebizni tışına yeter. Şu halğa bulay qaray turup, bizin Maskew qumuq qurum «QUMUQLAR» köp işleni başğaça yaşawğa çığara. Eki yılnı uzağında Maskew qumuqlar bek harakatlı abatlar alıp, bizin dünya darajalı qahermanıbız Abdulhakim İsmayılownu atın göterdiler. Eki yıl alda bek eşitilegen, Abdulhakim-ağaynı özleni milletlerine yazağanlanı tawuşu da az boldu, nege tügül, Maskew qurumnu güçü bulan, taxşahardan qayrı, Sankt-Peterburgda, İriston, Mıçığış wa Dağıstan cumhuriyatlarda qumuqlar Abdulhakim İsmayılownu suratların tutup, oramlağa çıqdı, toqtawsuz Yayılış-sayfalarda yazdı wa federal hukumatğa İsmayılow qumuq bolğanın açıq aytdırdı. Ondan soñ başğa millertleni wakilleri qalamlarını şaqıları bitgendey, yazağanın toqtatdı. Ozoqda bu bir misaldır, amma özün xalqın süyegen adamğa mundan ullu süyunçü yoqdur. Har işde bulay birlikde yurümege bizge ne zat çetim bola? Yolda bolağan bir zat sama yoqmu eken?

Awropa millet Awropalı küyde yurür

Dünya bulan yayılmaq qorqunç tügül dep esime gele, tek barğan yerinde tas bolmaq ullu zaraldır. Eki qumuq bar yerde bizin qurum bolma gerek, törelege göre işleygen wa öz milli madaniyatın, dinin, kelpetin, tarixin wa tilin tas etmege qoymayğan. Qumuq xalq Awropa milletleni biri, olay bolğan soñ özünü saqlaw işde bizin xalq Awropalı küyde abatlar alma gerek. Lap başlap özquruluş etip, barı da imkanlıqlanı xalqğa paydağa qollap. Maskewde yaşayğan qumuqlanı işlerini bu prinsip aslu bir kürçüsü. Oğar köpler bek şat wa razi. Olay bolğan soñ, şo biz kant etegen yayılğan halnı, bizin harakatlığıbız bulan, bizge paydağa aylandırma bolabız. Misal uçun cuhut camiyatlar dünya bulan yayılsa da, öz milli gereklerin ne yerde de saqlay wa yaqlay. Qumuq millet bu işde biröwden de osal çı neçik de tügül, köplerden güçlü dese de, şişdiriw bolmas. Maskewdegi milli qurumlanı arasında qumuq qurum aslu yerni tuta. Bu hal eki yıllı harakatlı işin çığışı. Dağı da eki yıl getse, ne bolup da bolar. 

Menlik tarixibizden, tarixibiz igitleribizden

Bizin menligibizni bizin tarixibiz qura. Bizin tarixibizni Abdulhakim İsmayılow yimik bizin milli igitleribiz öz qanı bulan tayışmayğan esgeriw kitaplağa yaza. Ozoqda, biz bizin qaherman desek de, Abdulhakim İsmayılow yañız biziniki bolup qalmay, ol saw dünyanı igiti. Tek şo xasiyatnı, igit küyde yurüşnü, oğar bizin millet bergen — qumuq atası, qumuq anası, igitibiz arasında yaşağan Çağarotar camiyat. Olay bolğan soñ xalqaralı darajağa bizin xalq bergen yulduzlanı birisi bizin Abdulhakim İsmayılow. Birinçi innır ay, ozoqda, bizge bayram gün bolma gerek, nege tügül Qumuqnu dünyağa atın aytdırğan yulduzubuz şu gün tuwğan. Bulay günlege özübüz ahamiyat bermesek, biröw de bermes. Dünyada bar barı da qumuq camiyatlar atın esgerip birinçi innır ayda harakatlar etme gerek. Har zaman da Abdulhakim-ağay esibizden taymayğannı biz gelegen naslulağa görsetme gerekbiz. Bizden görgenin olar da etse, bizin tarix de dawam eter, o güçlense, tışda tas boluw uçun bolağan qorqunçlar da osal bolar. Bu pikrunu başğaça aytsa, Abdulhakim-ağay wa onu yimikler bizin yureklerde neçe yaşasa, onça zaman bizin menligibiz tas bolmay, yayılıp turağanlığıbız kemlik bolmay turajaq.

Arslan Xasanlı, QUMUQLAR degen Maskew qumuq qurumnu başçısı

comments powered by HyperComments